February 23, 2017

LEDS-ის სამეთვალყურეო საბჭოსთან და USAID-ის საქართველოს ოფისის თანამშრომლებთან შეხვედრა

2017 წლის 23 თებერვალს Winrock International-ის ორგანიზებით საქართველოს გარემოსა და ბუნებრივი რესურსების დაცვის სამინისტროში გაიმართა დაბალემისიანი განვითარების სტრატეგიის (LEDS) სამეთვალყურეო საბჭოს გაფართოებული შეხვედრა, რომელიც გახსნა გარემოსა და ბუნებრივი რესურსების დაცვის მინისტრმა, ბატონმა გიგლა აბულაშვილმა. შეხვედრას ასევე ესწრებოდა მინისტრის მოადგილე, ქალბატონი ეკა გრიგალავა, კლიმატის ცვლილების სამსახურისა და სხვა სამსახურების/დეპარტამენტების, ასევე სხვა სამინისტროების და არასათავრობო სექტორის წარმომადგენლები.

შეხვედრაზე „რემისიის“ წარმომადგენლებმა დღეის მგომარეობით ორგანიზაციის მიერ შესრულებული სამუშაო და შემდგომი ნაბიჯები წარმოადგინეს. კერძოდ, ანა სიხარულიძემ წარადგინა LEDS ე.წ. ენერგეტიკული თავების (ენერგეტიკა, ტრანსპორტი, შენობები, მრეწველობა) შემუშავებისას იდენტიფიცირებული ძირითადი მიგნებები და ანალიტიკური სამუშაოს შედეგად მიღებული დასკვნები და რეკომენდაციები. ანა სიხარულიძემ საბჭოს წევრებს ასევე წარუდგინა LEDS-ის ნარჩენების თავის შემუშავებისთვის ამ დროისთვის ჩატარებული სამუშაო, კერძოდ ინვეტარიზაციის შედეგები და ბიზნესის ტრადიციული გზით განვითარების (BAU) სცენარის პირველადი ვარიანტი.

მარინა შვანგირაძემ საბჭოს წევრებს გააცნო LULUCF-ის თავის შემუშავებისას გაკეთებული დაშვებები შეშის მოხმარებასთან დაკავშირებით, ასევე LEDS-ის გაზომვის, ანგარიშგების და ვერიფიკავიის (MRV) კონცეფციის სქემა, სადაც დეტალურად გაწერილია ეტაპები, პროცესები და ძირითადი მოთამაშეები.

24 თებერვალს, ასევე Winrock International-ის ორგანიზებით აშშ-ს საელჩოში გაიმართა საინფორმაციო შეხვედრა აშშ-ს საერთაშორისო განვითარების სააგენტოს თბილისის ოფისის თანამშრომლებისთვის, სადაც რემისიის ექსპერტმა- ანა სიხარულიძემ წარმოადგინა რემისიის მიერ შესრულებული სამუშაო, ძირითადი მიგნებები და შემდგომი ნაბიჯები. ორივე შეხვედრა ჩატარდა პროექტის “შესაძლებლობების გაძლიერება დაბალემისიანი განვითრების სტრატეგიისთვის” ფარგლებში